അവൾ
അവൾ
----------
താമരപ്പൂക്കളേ, ലജ്ജിച്ച് തല താഴ്ത്ത -
താരകറാണിയവൾ വരുമ്പോൾ
കാർമേഘക്കൂട്ടമേയോടിയൊളിക്ക നീ -
കാർക്കൂന്തൽക്കെട്ടൊന്നഴിഞ്ഞീടവേ
ആദിത്യകിരണമേ,തെല്ലിട മങ്ങിയോ
ആമോദമായിന്നവൾ ചിരിക്കേ ..!!
കണ്ണിലെ കണ്മഷിക്കണ്ടിട്ടസൂയയാൽ -
കരിവണ്ടു മണ്ടിയൊളിച്ചു പോയ്
ആ മുടിക്കെട്ടിൽ തലചായ്ച്ചുറങ്ങുന്ന-
വെണ്‍മുല്ലപ്പൂവിന്നിതെത്ര ധന്യ !
പുൽകൊടി നാമ്പുകളെല്ലാമാദേശത്തിൽ -
പുളകിതരായ് അവൾ നടക്കേ !
പാടവരമ്പിലെ പിച്ചിച്ചെടികളോ -
പാരാകെ പൂക്കളം തീർക്കയായ്
കാവിലെ കൽവിളക്കമ്പേയണഞ്ഞു പോയ് -
കാവ്യ മനോഹരിക്കണ്ണുചിമ്മേ
കാവിലെ ദേവിയോ അപ്സര കന്യയോ -
കാമിനി സങ്കൽപ്പ പൂർണതയോ !
പനിനീർപ്പൂവുകൾ ചാലിച്ചെടുത്ത പോൽ -
പരിമളം വീശും തേൻ മൊഴിയും !
പാറകൾപോലുമണിഞ്ഞു പോയ് രോമാഞ്ചം -
പാവനമവൾ തൻ പാദമൂന്നേ !
നെറ്റിത്തടത്തിലെ ചന്ദനരേഖയിൽ -
പറ്റിച്ചേർന്ന് കിടക്കുന്നു ശ്രീലകം !
ചേലൊത്ത നാസികത്തുമ്പിലെ കാന്തിയോ -
പാലൊളിത്തിങ്കളുദിച്ച പോലെ !
പൂവെന്നു ചൊല്ലിയെത്തുന്നു ശലഭങ്ങൾ -
പൂന്തേനുണ്ണുവാനവൾ ചൊടിയിൽ !
അരയന്നപ്പിടപ്പോലവൾ നടക്കേ -
അരയാലുപ്പോലും തരിച്ച് നിന്നു !
ആകാശസീമയിൽ താരകക്കൂട്ടങ്ങൾ -
ആകാംഷയോടെ വിറച്ചു നിൽപ്പൂ !
പുലരികൾ കണിയായൊരുക്കി വെപ്പൂ -
പുണ്യമേ നിൻ ലാസ്യരൂപഭംഗി !
അവളെയൊരുക്കിയലങ്കരിക്കാനായ് -
അവനിയിൽ പൂക്കളേതർഹരായി..!
നിന്നെക്കണ്ടു നിൽപ്പൂ കവിമാനസം -
നിലയില്ലാമോഹക്കയത്തിലായ് !
ഭൂലോകസൗന്ദര്യശിൽപ്പമേ വെൽക നീ -
ഭൂഷണം ചാർത്തുകീ പാരിടത്തിൽ ..!!!
---------------------രാധിക---------------------------
Not connected : |
