പോയവള്‍.. (കവിത)-അന്‍വര്‍ ഷാ ഉമയനല്ലൂര്‍
പിരിഞ്ഞകന്ന വേളയില്‍
നിനക്ക് പുതയ്ക്കുവാന്‍ നല്‍കിയതെന്‍
പ്രാണന്റെ കീറത്തുണി.
എരിപുരണ്ട സന്ധ്യയില്‍
പൊന്‍തൂലികയില്‍നിന്നുരുണ്ടുവീണത്
മമ ഹൃദയനിണത്തുളളി.
സ്മരണയിലെരിയുന്നത്:
പറക്കമുറ്റാത്ത വാക്കുകളെച്ചേര്‍ത്തണച്ച-
നിറമറ്റ സായാഹ്നങ്ങള്‍.
വിസ്മരിക്കാനാകാത്തത്:
താഴേക്കു ചാഞ്ഞുനിന്ന ചിന്തയാലെന്റെ-
സ്വപ്നത്തിന്‍ ചിറകറ്റത്.
യൗവ്വനം മധുരിക്കവേ,
നെഞ്ചിന്‍തുടിപ്പൊന്നുണരാന്‍മടിച്ചനാള്‍
നീയുണര്‍ത്തുപാട്ടായത്.
നീ നിത്യനിദ്രയിലെങ്കിലും
ഇന്നലത്തെപ്പോലകതാരില്‍ത്തെളിയുന്നു
നിന്നെഞാനറിഞ്ഞകാലം.
കേള്‍ക്കുന്നതില്ലെയെന്‍
വാക്യത്തിലൂടൊരു വീണാവിലാപഗീതം;
മൊഴിവറ്റിയ നൊമ്പരം.
Not connected : |
