പ്രണയത്തിന്റെ മുറിവുകള്‍..
കൂട്ടുകാരീ
നിനക്കറിയുമോ..
എന്റെ ഉണങ്ങാത്ത മുറിവുകള്‍
ഏതോ വിഷപ്പാമ്പ്
കൊത്തിയ മുറിപ്പാടില്‍,
വീണ്ടും പഴുക്കുന്ന,
വിഷരക്തം ചീറ്റുന്ന,
പുഴുക്കള്‍ നുരയ്ക്കുന്ന,
പല്ലടയാളങ്ങള്‍
പാമ്പ് ഏതറിയാതെ,
വിഷം ഏതറിയാതെ,
മരുന്നില്‍ കരിയാതെ,
പഴകിയ മുറിവുകള്‍...
രാവ് പുലരുമ്പോള്‍
രക്തം കുതിര്‍ന്ന കിടക്കയും
അറിയുമോ കുട്ടുകാരീ...
നീ, മധുരം പുരട്ടി
എനിക്ക് നീട്ടിയ
പാപത്തിന്റെ പഴത്തില്‍
ഒരു തക്ഷകന്‍ ഒളിച്ചിരുന്നുവോ?
ഇരുട്ടില്‍ വളര്‍ന്ന്,
വിഷം ചീറ്റി,
പല്ലുകള്‍ ആഴത്തില്‍ താഴ്ത്തുന്ന
കരിനീല നാഗമായി
ഒരു തക്ഷകന്‍ ഒളിച്ചിരുന്നുവോ?
ചലം ചീറ്റി പഴുക്കുന്ന
വേദനപ്പാടാവാന്‍,
പുലരിക്കിടക്കയില്‍
ചുകപ്പു വരയ്ക്കുവാന്‍,
പഴുപ്പിച്ച കനലിന്റെ
നീറ്റലുകള്‍ ആവാന്‍,
കുട്ടുകാരീ..
നിന്റെ പ്രണയത്തില്‍
ഒരു തുള്ളി വിഷവും
കലര്‍ന്നിരുന്നോ?
Not connected : |
