ഓണമെത്തി....
ഓണമെത്തി
===========
ഓണമായോണമായോണമായ് മലയാള
ക്കരയാകെക്കോടിയുടുത്തുവല്ലോ
കരിമേഘംമാറിയ മാനത്തു പൊന്നൊളി -
വീശിയാത്തമ്പുരാനെത്തിയല്ലോ
ഇത്തിരിക്കുഞ്ഞനാം തുമ്പപ്പൂവിരിയുന്ന
തൊടിയിലായ്പ്പൈതങ്ങളാടിത്തിമിര്‍പ്പൂ
മുക്കുറ്റിപ്പൂവുപിണങ്ങി നില്‍ക്കുന്നതു
മന്ദാരം പുഞ്ചിരിച്ചെത്തിനോക്കി
ചെമ്പരത്തിപൂവും ചെത്തിയും ചുണ്ടത്തു
ചെഞ്ചായം പൂശിയൊരുങ്ങിയെത്തി
അഞ്ജനമെഴുതിയ കാക്കപ്പൂ വഴിയോര -
ത്തങ്ങനെ ശങ്കിച്ചുനിന്നിടുന്നു
ചെമ്പകമാട്ടെ മാലേയംചൂടിയി -
ട്ടിമ്പമോടങ്ങനെ പുഞ്ചിരിച്ചു
തുമ്പികള്‍ പാറിപ്പറക്കുന്ന പുഴയോര-
ത്താരോ കളിത്തോണി കൊണ്ടുവന്നു
തേന്മാവിന്‍കൊമ്പത്തു കെട്ടിയൊരൂഞ്ഞാല-
ഉന്മേഷമോടതാ കാത്തുനില്‍പ്പൂ
ആരാണുവന്നെന്നെപുല്കുവതാദ്യ -
മാത്തെങ്ങോലത്തുഞ്ചത്തുകൊണ്ടുപോകാം
ഒന്നതില്‍ക്കയറിയിട്ടാകാശമുറ്റത്തെ
വെണ്‍പൂവു തൊട്ടുമടങ്ങിയെത്താന്‍
ബാല്യത്തിലേയ്ക്കൊന്നു പോകാന്‍ കഴിഞ്ഞെങ്കി-
ലാകെയൊരിയ്കലെന്നാശിച്ചുഞാന്‍ .
Not connected : |
