സംഹാരതാണ്ഡവം
കാലം മാറി വേഷഭൂഷാദികൾ മാറി
ഇനിയും മാറിയില്ല മർത്യൻതൻ യുദ്ധക്കൊതി
സ്വാർത്ഥ താത്പര്യങ്ങൾ ഏറിവരും കാലം
മനുജരോ യുദ്ധക്കൊതിയിലാണ്ടുപോയ്
യുദ്ധത്തിൻ സംഹാരം ഈ ധരണിയിലെങ്ങും
അന്ധകാരം വിതയ്ക്കുന്നുവല്ലോ കഷ്ടം
ഹാ....! എന്തൊരാഘാതമീ നിമിഷങ്ങൾ
മനുഷ്യനെ മൃഗമാക്കുന്ന ഭീകരരംഗങ്ങൾ
അത്യുൽസാഹത്തോടെ പോരടിക്കുന്നിവർ
കുരുതിയുടെ പടക്കളം തീർക്കുന്നു ധരണിയിൽ
മനുജനൊരരിയാമീ യുദ്ധത്തിൽ ഫലം
ധരണിയെയൊട്ടാകെ കണ്ണുനീരണിയിക്കും
യുദ്ധമാം വേടൻ വേട്ടയാടിപ്പിടിക്കുന്നതോ
അമൂല്യമാം മാനവ ജീവിതത്തെയല്ലോ
ഈ കുരുതിതൻ ഫലമനുഭവിക്കുന്നവർ
വേട്ടയ്ക്കിരയായൊരാ മാൻപേടയെപ്പോലെ
യുദ്ധം വിതയ്ക്കുന്ന ദുരിതങ്ങളൊക്കെയും
യുദ്ധക്കൊതിയന്മാർ അവഗണിക്കുന്നുവല്ലോ
അവരറിയുന്നില്ല ജനങ്ങളുടെയീ ദീനരോദനം
ജനങ്ങളെ നിർദയം കൊന്നൊടുക്കുന്നു ഇവർ
പറയൂ മനുഷ്യാ എന്തിനായ് ഈ യുദ്ധം
നിൻ സ്വാർത്ഥലാഭത്തിനോ ജനനന്മയ്ക്കോ
യുദ്ധങ്ങൾ കൊണ്ടുനീ നേടിയെടുക്കുന്നൊരാ
സ്വാർത്ഥലാഭങ്ങൾ ക്ഷണികമെന്നോർക്കനീ
ജനനന്മയാണു നിൻ ലക്ഷ്യമെന്നുണ്ടെങ്കിൽ
ലോകമെമ്പാടും നീ സ്നേഹം വിതച്ചിടൂ
Not connected : |
