ഒറ്റ നക്ഷത്രം,ഏതോ കിനാവ്
പടിവാതിലില്‍ വന്നെത്രനേരമുദിച്ചു നിന്നിട്ടും
താരകേ,മിഴിപാതിചിമ്മിത്തുറന്നില്ല ഞാന്‍
ഒരു നേരവുമെന്നോര്‍മ്മതന്‍ വാതിലിലൂടെ
നിന്‍ വരവൊന്നും കണ്ടറിഞ്ഞില്ല ഞാന്‍
അനുരാഗത്തിന്‍ നീലരശ്മികള്‍ കൊണ്ടെന്നെ
പതിയേ പൊതിഞ്ഞതുമറിഞ്ഞില്ല ഞാന്‍
പാതിയുറക്കത്തിന്‍ പ്രീയജാലകങ്ങളില്‍
പാതിരാക്കാറ്റുലയുന്ന പൂമരക്കാഴ്ചകള്‍
വിജനമാം പാതയോരം മധുരലതാഗൃഹം
അഴലേറും മിഴിയടച്ചു നീ പിരിഞ്ഞു പോകേ
താരകേ,മിഴിപാതിചിമ്മിത്തുറന്നില്ല ഞാന്‍
നിശാഗന്ധികള്‍പൂത്തനാള്‍ നിലാവിലെ
വരമന്ദഹാസമായരികില്‍ വന്നിരുന്നു നീ
താരകമിഴിയിതള്‍പ്പൊന്നുരുക്കിവച്ചു
സാഗരത്തിരയിലും പൊട്ടുകുത്തിമിനുക്കി
ദൂരതീരത്തുമറഞ്ഞതുമറിഞ്ഞില്ല ഞാന്‍
പാതിമരണമെന്നാരോപറഞ്ഞോരുറക്കം
ആദിമതമസ്സിന്‍ ചേതനയിലെ മയക്കം
നഷ്ടങ്ങളെത്രയെന്നറിഞ്ഞില്ലഞാന്‍
ഇഷ്ടമായിനിയുദിക്കുന്നേരം,താരകേ
മിഴിവാതില്‍ തഴുതിടാതെ നോക്കിയിരിക്കും
എഴുതിയത്-ജയരാജ് മറവൂര്‍
Not connected : |
