ശവഘോഷയാത്രകൾ
വഴിയരികിൽ പടം പൊഴിച്ചൊരു പാമ്പ്
വന നിഗൂഡതകളിലേക്കു മറഞ്ഞപ്പോൾ
ആ പടവും ചുമലിലേന്തി
ഒരു കൂട്ടം പുളിയുറുമ്പുകൾ
ശവഘോഷയാത്ര നടത്തി ...
ദുർബല ഭൗതികപിണ്ഡത്തെ
ഉപേക്ഷിച്ചൊരാത്മാവ്
കാല നിഗൂഡതകളിലേക്കു മറഞ്ഞപ്പോൾ
ആ ഭൗതികപിണ്ഡം ചുമലിലേന്തി
ഒരു കൂട്ടം ആളുകൾ
ശവഘോഷയാത്ര നടത്തി ...
തേനെല്ലാം വറ്റിയ ഒരു പൂവിനെ
ഉപേക്ഷിച്ചു വണ്ട്‌ പറന്നകന്നപ്പോൾ
മണ്ണിലടർന്നു വീണ ദലങ്ങളെ
പെറുക്കിയെടുത്തൊരു കാറ്റ്
ശവഘോഷയാത്ര നടത്തി ...
Not connected : |
