മൃത്യോമാ.....(കവിത)-അന്‍വര്‍ ഷാ ഉമയനല്ലൂര്‍
കവിത അന്‍വര്‍ ഷാ ഉമയനല്ലൂര്‍
മൃത്യോമാ.....
വീണ്ടുമീ ജീവിതച്ചില്ലുപാത്രത്തില്‍ നീ
കല്ലെറിഞ്ഞീടുവതെന്തേ
മുളളുകളാലെന്‍ മുറിവുകള്‍തുന്നവേ-
യുന്നംപിടിക്കുന്നതാരെ,
മന്ദമന്ദം കുറഞ്ഞൊഴുകുന്ന സ്പന്ദന-
മനുദിനമീഹൃത്തുലയ്‍ക്കേ,
കണ്‍കളിലെണ്ണയൊഴിച്ചുനീയെന്മനം
പൊളളിച്ചെടുക്കുന്നതെന്തേ ?
അതിശൈത്യമെല്ലാമകലവേ, നെഞ്ചിലെ-
ത്തീകെടുത്താന്‍ തുടങ്ങുമ്പോള്‍
ആകെത്തുരുമ്പിച്ച സ്വപ്നങ്ങളും കൊച്ചു-
മോഹങ്ങളുംഞാന്‍ സ്മരിക്കെ,
മന്മനോവാതില്‍ത്തകര്‍ത്തകത്തെത്തിനിന്‍
കല്പനയോതുന്നു കാലം
ഞാനറിയുന്നുനിന്നാജ്ഞപാലിക്കുന്ന
മൃത്യുവിന്‍ കരതലസ്പര്‍ശം.
Not connected : |
