ബാല്യം
ബാല്യം:
കൂരിരുൾ ചുരുളുകൾ മാനത്ത്‌ പടരവേ....
കുളിരുമായ് ചന്ദനക്കാറ്റൊന്നു പുൽകവേ....,
എന്മനം അറിയാതെ ഓർത്തുപോയ് കാലമേ...,
നീ കവർന്നെടുത്തൊരെൻ സുന്ദരബാല്യത്തെ.....
കല്ലെറിഞ്ഞൊരാ മൂവാണ്ടൻ മാവിലെ,
മാമ്പഴത്തിന്റെ വർണ്ണച്ചിരികളും..,
നുള്ളി നോവിച്ച പിച്ചകപ്പൂവിലെ -
തേൻ നുകർന്നിടും ശലഭഭംഗിയും....
മഞ്ഞു തുള്ളിയിൽ നിറയുന്ന കൗതുകം-
മാരിവില്ലിൻ നിറങ്ങളായ്‌ പെയ്തതും ..
വർഷമേഘനിർഘോഷഖഡ്ഗത്തിനാൽ -
ഭീതിപൂണ്ടു ഞാൻ വിറയാർന്നു നിന്നതും...
കൂട്ടുകൂടി എന്നും കളിച്ചിടാൻ ,
സ്നേഹമേവും കൂട്ടുകാർ വരും...
പൂങ്കുയിലിന്റെ പാട്ടൊന്നു കേൾക്കുവാൻ-
ഞങ്ങളേവരും ചെവിയോർത്ത്‌ പോയിടും....
രാവിലെന്നും താരാട്ട് കേട്ടു ഞാൻ -
അമ്മതൻ മടിമേലെ കിടന്നതും...
നന്മചൊല്ലും കഥകളിൽകൂടിയെൻ-
ഉള്ളിലെന്നും പുണ്യമായ് താതനും....
നിഷ്കളങ്കം തുടിക്കുന്ന മാനസം ,
ഒന്ന് തന്നെ ഹിതമായ ഭൂമിയിൽ,
സത്യസഞ്ചാരനൗകയിൽ അന്നു നീ -
എന്നെ കൊണ്ടുപോയ് നിർത്തിയ ബാല്യമേ....
ഒന്ന് വന്നങ്ങു പോയൊരു കാലവും,
എന്നിലേക്കിനി തിരിക്കയില്ലെങ്കിലും ,
ആഗ്രഹിക്കുന്നു ഞാൻ ആ നല്ല നാളിലെ -
ബാലനായ് പുനർജനിച്ചീടുവാൻ....
ആഗ്രഹിക്കുന്നു ഞാൻ ആ നല്ല നാളിലെ -
ബാലനായ് പുനർജനിച്ചീടുവാൻ......
Not connected : |
