വിതുമ്പുന്ന മുത്തശ്ശിക്കഥകൾ
വിതുമ്പുന്ന മുത്തശ്ശിക്കഥകൾ
പഴമയുടെ പൊട്ടിപ്പൊളിഞ്ഞ
വാതിലിൻ മറവിൽനിന്നതാ
എത്തിനോക്കി കണ്ണീരു -
വാർക്കുന്നു കഥകൾ
തൻ മുത്തശ്ശിമാർ .
പഞ്ചതന്ത്രങ്ങളും ഈസോപ്പ്
കഥകളും വാരിപ്പുണർന്ന
പഴയ ബാല്യങ്ങൾ കൊട്ടിയട-
യ്ക്കുവാൻ വെമ്പുന്നു
കാലിക പൈതങ്ങൾ .
മാറുന്ന ലോകമോ
ഇവരെ അറിഞ്ഞതില്ല ,
ഓടുന്ന ജീവിതങ്ങൾ
ഇവരെ കേട്ടതില്ല.
രാമനും കൃഷ്ണനും
ദേവനും ദേവിയും
ഐതിഹ്യമാലയും
ഏറെയിന്നകലെയായ്
കൗതുകവാതിൽ തുറന്നു
കൊടുത്ത കുഞ്ഞു കഥ-
കൾ മൃതപ്രായരാ-
യിന്നു മാറികിടക്കയോ?
രാമനാമങ്ങൾ മുഴങ്ങിയ
സന്ധ്യകൾ നീളെ,നമിക്കുന്നു
ടെലിവിഷൻ മുന്നിൽ .
ഓർമ്മതൻ ചെപ്പു മെല്ലെ
തുറക്കുമ്പോൾ വിതുമ്പി -
കരയുന്നു മുത്തശ്ശിക്കഥകൾ
നീന്തിക്കളിക്കും പിഞ്ചോ-
മനകളും നെഞ്ചിലേറ്റു-
ന്നതോ പ്രേമ-പ്രേത
കഥകൾ മാത്രം
ബെൻ ടെനും ഇ -മാനും
ടോമും ജെറിയും ,കുഞ്ഞു
മനങ്ങളിൽ വേഗത്തിൽ
കുടിയേറിപാർക്കയായ് ,
പിഞ്ചോമനകൾ തൻ'
സ്നേഹസാമീപ്യം കൊതി-
ച്ചിതാ കാത്തിരിക്കുന്നു
മുത്തശ്ശിമാർ ,ഒരു
കഥ കൂടി പറയുവാനായ്.
Not connected : |
