ഒരു പറവയുടെ വിരഹം
പോയ മാസത്തിലെ ചൂടിലെൻ ചിറകുകൾ
വാടി കരിഞ്ഞു പോയ് എന്നാകിലും....
മൂടി കിടന്ന കിളിവാതിലിൻ ചാരെ-
കൂനി ഇരുപ്പാണെപ്പോഴും ഞാൻ...
മണലുകൾ എരിയുന്ന ശവ്വാലിലെൻ ദാഹ-
ശമനത്തിനൊരു തുള്ളി നീരിനായല്ല..
നീയുണ്ണുമന്നത്തിൽ ഇത്തിരിയാലെൻ്റെ-
കാളുമുദരം നിറയ്ക്കാനുമല്ല..
ജനലഴിക്കപ്പുറം ഓടിവന്നെന്നോട്
കുശലം പറഞ്ഞവളെവിടെ...
പാൽ മണം മാറാത്ത ചുണ്ടിൽ വിടരുമാ
പഞ്ചാര പുഞ്ചിരിയെവിടെ ..?
മാമുണ്ടുകൊണ്ട് നിൻ അരുമയന്നെന്നോട്-
പോകാതെ എന്നരുളിയില്ലേ ?
ഒടുവിലവൾ നിൻ്റെ ഒരുവിരൽ തുമ്പത്ത്
ഉരയാതെ പൊയ്ക്കളഞ്ഞല്ലോ...?
വിളയാട്ടമില്ലാതെ കോണിൽ കിടക്കുന്ന
കളിപ്പാട്ടമെന്നപോൽ ഞാനും
ഇനി കുറേ നാളുകൾ കുറുകി ഇരിക്കും
നോവും നിന്നുള്ളു പോലെ....
Not connected : |
