വിഷാദ കാവ്യം 

കാവ്യ, നീയൊരു വിഷാദ കാവ്യമായ്
നീറുന്നൊരെൻ നെഞ്ചകത്തിലമരുന്നുവോ?
കനലാഴിയിൽ മുങ്ങി നിവരുന്നപോൽ
നിൻ കനലോർമ്മകളെന്നിൽ പടരുകയായ്

നീയെനിക്കാരായിരുന്നു?, അറിയില്ലയി-
പ്പോഴും അതെനിക്കജ്ഞാത രഹസ്യം
എങ്കിലും ഞാനോർക്കുന്നു സോദരീ
രക്ഷയ്ക്കു നീ കൈയ്യിലണിയിച്ച ബന്ധനം

ഞാൻ ഓർക്കുന്നു ,നീയന്നു ചൊന്നൊരാ
പ്രണയവും, നിൻ പ്രിയ്യ കാമുകനെയും
നിൻ പ്രേമഭാജനത്തെ പുകഴ്ത്തി നീയെ-
ന്നോടു നൂറുനാവാൽ പറഞ്ഞതെല്ലാം

ഋതുമതിയായ ദിനം മുതൽ നീ കണ്ടൊരാ
മായിക ലോകത്തെ നിൻ പ്രിയനായകൻ
അന്നൊരിക്കൽ നിന്നടുത്തായ് വന്ന്
ഇഷ്ടമെന്നോതിയ സുരഭിലമാം ദിനം

ഞാൻ ചൊന്ന മുന്നറിയിപ്പുകൾ നിർദയം
അവഗണിച്ചെന്നെ നീ പരിഹസിച്ചു
കണ്ണു രണ്ടുമന്നടച്ചു നീ വിശ്വസിച്ചവ-
ന്നെ നിൻ പ്രാണനിൽ പ്രതിഷ്ഠിച്ചുവോ?

സംശയത്തിനൊട്ടുമിടം കൊടുക്കാതവൻ
നിന്നെ ലാളിച്ചു, നീ മോഹിച്ച ദിനങ്ങൾ
നീയോ വിശ്വസിച്ചവനെനിൻ അക്ഷി പോൽ
ജീവിത പങ്കാളിയാക്കാൻ കൊതിച്ചുവല്ലോ

അങ്ങനെയൊരു ദിനം നിന്നോടവൻ കെ-
ഞ്ചിയെൻ പ്രിയ്യേ രതിസുഖം തന്നിടുക നീ
ആദ്യം മടിച്ചെങ്കിലും നീ വഴങ്ങിയന്നു നി-
ങ്ങളിരുവരും രതിസാന്ദ്രമായ് ആറാടി

പെട്ടെന്നൊരു ദിനം ഞെട്ടലോടിഞ്ഞു നീ,
നിന്റെയുളളിലായ് പുതുജീവന്റെ തുടിപ്പുകൾ
തളർന്നില്ലയെന്നാലും നീ ആശ്വസിച്ചു,
നിൻ പ്രാണനായകൻ കൈവിടില്ലെന്നതും

വിവരമറിഞ്ഞ നിൻ കപടനാം നായകൻ
പൊട്ടിച്ചിരിച്ചുകൊണ്ടാട്ടി നിന്നെ
കിട്ടേണ്ടതെല്ലാമെനിക്കു കിട്ടിയെന്നു-
ക്രൂരമായ് ചൊന്നിട്ടു നിന്നെയിറക്കിവിട്ടു.

പൊട്ടിത്തകർന്ന നീ ഞെട്ടിത്തെറിച്ചുകൊ-
ണ്ടാരാലും അഭയമില്ലാതെ വലഞ്ഞു
ഹൃദയം പിളർക്കുന്ന വേദന സഹിക്കാ-
തെനീ ആരാരുമറിയാതെ പോയ് മറഞ്ഞു

നിൻ കപടകാമുകൻ പുതിയ ഇരയെത്തേടി
മേടുകൾ തോറും പരതി നടക്കവേ
നഗ്നമാം മേനിയെ ധരണിയിലുപേക്ഷിച്ചു
ജീവ ചൈതന്യവുമായ് നീ പറന്നകന്നു

കാവ്യ, നീയൊരു വിഷാദ കാവ്യമായ്
നീറുന്നൊരെൻ നെഞ്ചകത്തിലമരുന്നുവോ?
കനലാഴിയിൽ മുങ്ങിനിവരുന്നപോൽ
നിൻ കനലോർമ്മകളെന്നിൽ പടരുകയായ്

0

രചിച്ചത്:ശ്രീജിത്ത് എസ്സ് എച്ച്
തീയതി:11-10-2016 09:12:51 AM
Added by :sreeu sh
വീക്ഷണം:295
നിങ്ങളുടെ കവിത സമ്മര്‍പ്പിക്കാന്‍