തൂലിക
ഗുരു തന്ന തൂലിക.....
എവിടെയെന്നറിയില്ല!
അതു നഷ്ടമായെന്നൊരറിവെന്നെ നീറ്റി
പെട്ടിയിൽ, വട്ടിയിൽ,തട്ടിൻപുറത്തുള്ള
ചാക്കിൽ, പത്തായത്തിൽ,
അനിയന്റ സഞ്ചിയിൽ
എങ്ങും തിരയുവാനില്ലിനി, ഞാനെന്റെ
അശ്രദ്ധയാം ഉമിത്തീ തന്നിൽ നീറി
ഇനിയെന്തു ചൊല്ലും ഞാൻ
എൻ ഗുരുവിനോടു്
പ്രേമ പൂർവ്വം തന്ന ഉപഹാര -
മെങ്ങോ മറന്നു വെച്ചെന്നോ?
ഇനിയൊന്നു കൂടിത്തരണമേയെന്നോ?
മനമുരുകി തനു തളർന്നൊരിടത്തിരിക്കവേ
അകതാരിലറിവിന്റെ
ചിറകു മുളക്കുന്നു.
ഒരു മറ്റൊലി പോലെയുള്ളിൽ നിന്നാരോ
മൊഴിയുന്നു ഗുരു തന്നതൊരു പേനയല്ല!
അറിവിന്റെ, ഉള്ളിലെ ഉണർവിന്റെ
സത്യപ്രകാശ ജാലത്തിന്റെ
ഓംകാര ധ്വനിയുടെ
നിർമ്മല പ്രേമ പ്രവാഹജാലത്തിന്റെ -
യൊരു കണിക മാത്രം, അതു വെറും ബിംബം
സത്യവൈരാഗ്യജ്ഞാനമാനന്ദമാം
കുളിർ ഹർഷ പൂരത്തിൻ ഹേതുവാം മേഘം!
Not connected : |
