അവൾ
അവൾ
കഥകളേറെ ചൊല്ലി അവളെൻ മനസ്സിൽ ഒരു പാട്ടുപോലെ നിറഞ്ഞതാണ് ,
കഥയൊന്നുമില്ലാകഥയൊന്നു കേട്ടെൻ മനസ്സൊരുപാടു ചിരിച്ചതാണ് .
നനയാതെകാത്തൊരാമിഴികൾ ഞാൻ ; എന്നോ മനസ്സിൽ വരച്ചിട്ടതാണ് ,
അവളുടെ മൊഴിയിലെ മധുരവും മൗനവും എന്നോ എനിക്കായി നൽകിയതാണ് ,
മിഴിയിലും മൊഴിയിലും അവളെന്ന നൊമ്പരം ഇന്നെനിക്കാരോ പകർന്നതാണ് .
ജാലകവാതിൽ തുറന്നവൾ കിനാക്കണ്ടിരുന്നൊരാനീലരാവിൽ
ജനലഴിതന്നിലൂടവളുടെ സന്ദേശം രാപ്പാടി അന്നെനിക്കെത്തിച്ചതാണ് .
രാവും പകലും പൊഴിയുന്നുവെങ്കിലും രാവേറെയുണ്ടെന്ന തോന്നലാണ് ,
ഒത്തിരിയുണ്ടാവേദനയെങ്കിലും ഇത്തിരിയെന്നും നിനച്ചതാണ് .
മാരിവിൽ അഴകുള്ളവൾ അന്നു മാരിയായ് പെയ്ത മരുഭൂമി ഞാൻ,
മനസ്സിൻ കവാടം തുറന്നവൾ വന്നപ്പോൾ താമസ്സന്നകന്നെന്ന് ഞാൻ കരുതി .
നാമെന്ന സ്വപ്നം നെയ്തുകൂട്ടി ഞാൻ; ഞാനെന്നതൊക്കെ മറന്നുപോയി .
ഒന്നെല്ല രണ്ടെന്നവൾ പറഞ്ഞപ്പോൾ രണ്ടായ് പിളർന്നുപോയെൻ ഹൃദയം ,
രാവും പകലുമൊരുപോലിരുണ്ടതെന്ന് അന്നെനിക്കാദ്യമായ് തോന്നിയല്ലോ.
പുഞ്ചിരിച്ചെന്നെ വരവേറ്റവൾതൻ പുഞ്ചിരിയന്നെനിക്കന്യമായി .
അവളെന്ന് കേൾക്കുമ്പോളറിയാതെയുണരുന്നൊരാ ഹൃദയത്തിൽ
അവളിന്ന് ശാശ്വതമല്ലാത്തൊരോർമ്മമാത്രം .
Not connected : |
