നീതിക്കെന്തൊരു വിലയിവിടെ?
കിണറ്റിൻ കരയിൽ കുളിച്ചു നിന്നവനെ
ഏതോ ‘കിണർവാസി’ വലിച്ചകത്തിട്ടു,
"വെള്ളം ശ്വാസകോശം നിറഞ്ഞു മരിച്ചു,"
-പോസ്റ്റുമാർട്ടം റിപ്പോർട്ടു വന്നു.
തള്ളിയവനില്ല, കൊന്നവനില്ല.
ദൃക്സാക്ഷികളാരുമില്ല.
ചത്തവനാറടിക്കുഴിയിലില്ലാതെയുമായി.
സ്കൂട്ടറിൽ പോയ ഗുമസ്തനെയേതോ
അതിവേഗക്കാർ ഇടിച്ചുകടന്നു.
മരണം തൽക്ഷണമുണ്ടായി.
കൊന്നതാരെന്നോ, കാറിൻ നമ്പറോ
ആർക്കുമറിയില്ല; പിന്നെന്തൊരു കേസ്?
ഒരു ടണൽ കരാറിൽ തിരിമറി നടത്തി,
ലക്ഷങ്ങളുടെ കെട്ടുകടത്തി.
കേസായപ്പോൾ സാക്ഷികൾ രണ്ടു,
അവരാണീവിധം കൊലചെയ്യപ്പെട്ടോർ,
കൊടും കേസുകളായാലും സാക്ഷികൾ വേണം.
സാക്ഷികളില്ല; കേസുകൾ തള്ളി,
നീതിക്കെന്തൊരു വിലയിവിടെ?
നമ്മുടെ കുത്തക മുതലാളിപിന്നെ
വലിയൊരു വകുപ്പിൻ മന്ത്രിയുമായി.
ഡിജിപിയും ഐജിയുമെല്ലാം
പുത്തൻ മന്ത്രിയെ സല്യൂട്ടടിച്ചു.
Not connected : |
