കണ്ണാടിപ്പാട്ട്
കണ്ണാടിപ്പാട്ട്
കണ്ണാടിക്കഥ കേട്ടോളൂ
കണ്ണുതുറന്നിതു കണ്ടോളൂ
കിണ്ണം കൊട്ടി കളിച്ചോളൂ
കണ്ണാടിപ്പാട്ടിന്നരുളാം.
സ്ഫടികപ്രതലം കണ്ണാടി-
യ്ക്കടിയിൽ രസമെന്നൊരു ലോഹം
ഞൊടിയിൽ പ്രതിബിംബം കാട്ടു-
ന്നടിയിൽ പ്രതലം, പ്രതിഫലനം.
മകരം, മുകുരം പര്യായം
തകരുന്നുടയുന്നതിവേഗം
പകലെന്നുള്ളൊരു സത്യംപോൽ
പകരുന്നൊരു നൽപ്രതിബിംബം.
ഇടതീ വലതും ബിംബത്തിൽ
ചൊടിയിലെ ഭാവം സ്വയമറിയാം
തുടുതുടെ മോഹം പിടയുമ്പോൾ
പടുകിഴവനുമതിലൊരു നോട്ടം.
രക്ഷാവാഹനലക്ഷണമാ-
ണക്ഷരമിതിനാൽ തലതിരിയും,
തൽക്ഷണനേരം പിൻസ്ഫടികം,
രക്ഷകനക്ഷരതർജ്ജമയായ്.
ദർപ്പണഛവിമുഖശാസ്ത്രമതായ്
കപ്പലുമഗ്നിക്കിരയാക്കാം.
കോപ്പിതു പരിതോദർശിനിയും
ഗോപ്യമിതായിട്ടിരതേടും.
നിന്നു തിളങ്ങും കണ്ണാടി
വന്നു വിളങ്ങും മാലോകർ
കുന്നായ് പലവിധമഭിലാഷം
തന്നിടുമിവളൊരുമനമായി.
അര്‍പ്പണബോധവുമായ് വദനം
ദര്‍പ്പണമൊന്നതുമാവേണം
കൂര്‍പ്പില്ലാത്തൊരു വക്ത്രമതാ-
യാര്‍പ്പും വിളിയതുമാവേണം.
സന്ദീപ് വേരേങ്കിൽ
Not connected : |
