മംഗ്ലീഷ് മല്ലു
മംഗ്ലീഷ് മല്ലു : (കവിത)
"മലയാളഭാഷയെ കുട്ടിയുടുപ്പിട്ട്-
മലീമസമാക്കുന്ന മക്കളുടെ നാട്ടിൽ-
'മുലപ്പാലെന്ന്' പറയുവാനറിയാത്ത
'മല്ലു' വിനിഷ്ടമീ 'മംഗ്ലീഷിനെ'.
മിണ്ടാനറിയില്ല മൂളാനറിയില്ല
മലയാളമെന്നതോ കണ്ടാലറിയില്ല.
മിണ്ടുന്നതും പിന്നെ 'ടൈപ്പുന്നതും'-
'മലയാലി' എന്നു പുലമ്പുന്നതും-
പണ്ടൊരു പരദേശി ഛർദ്ധിച്ചു പോയൊരാ-
പത്രാസിൻ ഭാഷയെ കൂട്ടിക്കുഴച്ചല്ലേ?
മക്കളെ മോടിയിൽ മംഗ്ലീഷ് പറയിച്ച്-
മുറ്റത്ത് കൂട്ടിനായ് അൽസേഷൻ നായയും-
ചുണ്ടിൽ ചുവക്കുന്ന ലിപ്സ്റ്റിക്ക് വർഷവും-
ചടുലതാളത്തിനായ് ഹൈഹീൽഡുമായെത്തി-
തുള്ളിക്കളിക്കുന്ന തരുണിമണികളോ-
തമ്മിൽ പറയുന്നു മംഗ്ലീഷ് മാത്രം.
ചാനലിൽ ചെന്നൊന്നു 'ചാറ്റു'വാനും
ചടുലതാളത്തിനൊത്താടുവാനും-
മത്സരിക്കുന്നൊരാ 'അവതാര' ദ്രോഹികൾ
മനസ്സിനോ മരവിച്ച കാഴ്ചയായി.
മംഗ്ലീഷ് ചുണ്ടിലും ചേർത്ത് വച്ച്-
മക്കളെ മറുകരയെത്തിക്കുമ്പോൾ
മലയാളി മറക്കുന്നു മലയാളത്തെ.
മരിക്കുന്ന നമ്മുടെ പെറ്റമ്മയെ.
കുഞ്ചനും തുഞ്ചനും പാടി പുകഴ്ത്തിയ
കൊയ്ത്തുപാട്ടീരടി താളം പിടിച്ചൊരാ-
നന്മയുടെ നമ്മളുടെ ഭാഷയൊന്ന്
നേരിന്റെ ഭാഷയീ മാതൃഭാഷ.
മാറണമീ നവമാധ്യമ ശീലങ്ങൾ.
മാറണമീ നവജീവിത രീതികൾ.
അമ്മയിൽ നിന്നടരുന്ന കുഞ്ഞു പോലും-
ആദ്യം പറയുന്ന 'അമ്മ മലയാളം'.
അറിയില്ലൊരിക്കലും മലയാളിക്ക്-
അക്ഷരമുത്തിന്റെ മേന്മയിന്ന്.
അറിയുമൊരുനാളിലീ ഭാഷതൻ മേന്മ
അന്നിവിടെ മാറുമൊരു 'മംഗ്ലീഷു നാടായ്'
(........... അഭി..........)
Not connected : |
