നമ്മൾ ഒന്നിച്ച്.............
നമ്മൾ ഒന്നിച്ച് തൊട്ട ആകാശം,
നമ്മൾ ഒന്നിച്ച് നീന്തിക്കടന്ന പുഴ,
നമ്മൾ ഒന്നിച്ച് നടന്ന ഇടവഴികൾ
പെറുക്കിയെടുത്ത ചുവന്ന മഞ്ചാടികൾ,
ചിതറിയ കണ്ണാടി തുണ്ടുകളാൽ
ചുവരിൽ തീർത്ത മഴവില്ല്,
നിറഞ്ഞ നാണയക്കുടുക്ക
ഉടഞ്ഞ്‌ തീരുന്നതിനു മുൻപ് കണ്ട സ്വപ്നങ്ങൾ,
നമ്മൾ ഒന്നിച്ച് നനഞ്ഞ മഴ,
നമ്മൾ ഒന്നിച്ച് തീർത്ത കടലസുതോണികൾ,
തോട്ടിലെ പരൽ മീനുകൾ
ചത്തു പൊങ്ങിയ ചില്ലു കുപ്പികൾ,
നമ്മൾ ഒന്നിച്ച് പണിത കളിവീട്
ചോറുവച്ച ചിരട്ട പാത്രങ്ങൾ,
നമ്മൾ ഒന്നിച്ച് കണ്ട പകൽ പൂരങ്ങൾ
ഭയപ്പെടുത്തിയ കോമരങ്ങൾ,
പിന്നീട് നമ്മൾ ഒന്നിച്ച്....
പിന്നീട്, പിന്നീടെപ്പോഴോ
നമ്മൾ രണ്ടു പേരായി
നമ്മൾ രണ്ടു വഴികളായി
പരസ്പരം കൂട്ടിമുട്ടാത്ത രണ്ട് വഴികൾ.
Not connected : |
