വെള്ളിനക്ഷത്രത്തേയും കാത്ത്
ബവേറിയയിൽ വേരോടിപ്പടർന്ന
പോടുവൃക്ഷത്തിൽ വിരിഞ്ഞതു
വംശീയതയുടെ ചുടുകാട്ടുമുല്ലകളായിരുന്നു
വംശശുദ്ധിയും ഐക്യവുംഉന്മത്തരാക്കിയ
ആത്മബോധശൂന്യരുടെ ഹൃദയങ്ങളിലെ
നീലരക്തമൂറ്റിയായിരുന്നു അതിന്റെ വളർച്ച
സ്വേച്ഛാധിപത്യഭീകരതകൾ മയങ്ങിക്കിടന്നതു
ദേശസ്നേഹ മുദ്രാവാക്യങ്ങളുടെ
പുറന്തോടിനുള്ളിലായിരുന്നു
ഹോളോകോസ്റ്റ് നിർമ്മിച്ച
വേരറുക്കൽപ്രത്യയശാസ്ത്രത്തിന്നു കിട്ടയത്
ന്യൂറംബർഗ്വിചാരണകൾ മാത്രം..!
ഈ ആഗോളഗ്രാമവീഥിയിൽ
വംശവിച്ഛേദപ്രത്യയശാസ്ത്രങ്ങളുടെ കൊലവിളികൾ
നമ്മുടെ കണ്ഠനാഡിക്കും അടുത്താണ്
ആത്മബോധശൂന്യർ പെറ്റുപെരുകുന്ന ഇക്കാലത്തു
ന്യൂറംബർഗ് വിചാരണകൾപോലുമില്ലാത്ത
ഹോളോകോസ്റ്റുകളുംപെരുകിക്കൊണ്ടിരിക്കും
ശവങ്ങളും പച്ചച്ചോരയും മണക്കുന്ന
അന്യതാബോധത്തിന്റെ ഈ ഇരുൾവഴികളിൽ
ഇനിയെന്നാണൊരു വെള്ളി നക്ഷത്രം ഉദിക്കുന്നത്?
Not connected : |
