ദൈവത്തിൻ സ്വന്തം നാട്
ദൈവത്തെ അറിയാത്ത മനുഷ്യരുണ്ടാക്കിയ
ദൈവങ്ങളേറെയുള്ള ദൈവത്തിൻ സ്വന്തം നാട് !
മനുഷ്യൻ മരിക്കുന്പോൾ മതങ്ങൾ മത്സരിച്ചു
ദൈവങ്ങളെ രക്ഷിക്കും ദൈവത്തിൻ സ്വന്തം നാട് !
ദൈവത്തിൻ പേരു വിറ്റു കോടികൾ വാരികൂട്ടും
സമുദായങ്ങളുള്ള ദൈവത്തിൻ സ്വന്തം നാട് !
പാപികളുണ്ടാക്കുന്ന പണത്തിന്റെയോഹരി
പുണ്ണ്യവാൻമാരും വാങ്ങും ദൈവത്തിൻ സ്വന്തം നാട് !
പാതയോരത്തിനിയും പൈതങ്ങളുറങ്ങുന്പോൾ
പള്ളികൾ പണിയുന്ന ദൈവത്തിൻ സ്വന്തം നാട് !
ബാലവാടിയിൽപ്പോകും കുരുന്നു കുഞ്ഞുങ്ങളെ
പേപ്പട്ടി കടിക്കുന്ന ദൈവത്തിൻ സ്വന്തം നാട് !
ജാതിയും രാഷ്ട്രീയവും ഭിന്നിച്ചും കലഹിച്ചും
കൂത്തരങ്ങാക്കിത്തീർത്ത ദൈവത്തിൻ സ്വന്തം നാട് !
അന്യോന്യം നേതാക്കന്മാർ ചെളി വാരിത്തേക്കുന്പോൾ
അണികൾ രസിക്കുന്ന ദൈവത്തിൻ സ്വന്തം നാട് !
വിളയുന്നതൊക്കെയും വേലികൾ തന്നെ തിന്നു
വിതക്കുന്നോൻ വിശക്കും ദൈവത്തിൻ സ്വന്തം നാട് !
അഷ്ടിക്കു വക തേടാൻ കഷ്ടപ്പെട്ടേറെ ജനം
അന്യനാടന്വേഷിക്കും ദൈവത്തിൻ സ്വന്തം നാട് !
സ്വന്തം പേരെഴുതുവാൻ അറിയാത്ത വിദ്വാനും
നാടു ഭരിക്കാനാവും ദൈവത്തിൻ സ്വന്തം നാട് !
ഹിംസിച്ചതും ഭക്ഷിച്ചു ഖദറിട്ട ഗാന്ധീയർ
വിസ്ക്കി മോന്തിക്കുടിക്കും ദൈവത്തിൻ സ്വന്തം നാട് !
കള്ളനും പോലീസുംകൂടൊന്നിച്ചു കള്ളു മോന്തി
സമത്വമുറപ്പാക്കും ദൈവത്തിൻ സ്വന്തം നാട് !
ശ്രീ നാരായണ ഗുരു മണ്ഡപത്തിൻ മുന്പിലും
കള്ളുഷാപ്പുകളുള്ള ദൈവത്തിൻ സ്വന്തം നാട് !
നഗരസഭ കൂടി നഗരങ്ങളൊക്കെയും
നരക തുല്യമാക്കും ദൈവത്തിൻ സ്വന്തം നാട് !
നഗരങ്ങെളിലെങ്ങും മലിനക്കൂന്പാരങ്ങൾ
നിധി പോൽ സൂക്ഷിക്കുന്ന ദൈവത്തിൻ സ്വന്തം നാട് !
ഏതു വഴിയോരത്തും മൂത്രമൊഴിക്കാൻ ജനം
സ്വാതന്ത്ര്യം സന്പാദിച്ച ദൈവത്തിൻ സ്വന്തം നാട് !
പൊതുസ്വത്തെന്തായാലും അതിനു തീ വെക്കുവാൻ
ബന്തുകളുണ്ടാക്കിയ ദൈവത്തിൻ സ്വന്തം നാട് !
കൊലയും കവർച്ചയും ഉച്ചയ്ക്കു നടന്നാലും
തെളിവു ലഭിക്കാത്ത ദൈവത്തിൻ സ്വന്തം നാട് !
മനസാഷിയുള്ളോനെ മണ്ണിൽ ചവിട്ടിത്താഴ്ത്തും
വാമനന്മാരേറുന്ന ദൈവത്തിൻ സ്വന്തം നാട് !
വോട്ടെടുപ്പു കാലത്തു വമാനന്മാരൊക്കെയും
മാവേലി വേഷം കെട്ടും ദൈവത്തിൻ സ്വന്തം നാട് !
പെണ്‍വാണിഭക്കാരായ കള്ളസ്വാമിമാരുടെ
എണ്ണമേറിവരുന്ന ദൈവത്തിൻ സ്വന്തം നാട് !
ഇറക്കുമതി ചെയ്ത മാഫിയാ വിത്തു പൊട്ടി-
ക്കിളിർത്തു പടരുന്ന ദൈവത്തിൻ സ്വന്തം നാട് !
കുടിവെള്ളത്തിലെങ്ങും കൊതുകും കൂത്താടിയും
അണുക്കളും പെരുകും ദൈവത്തിൻ സ്വന്തം നാട് !
തെളിനീരൊഴുകിയ പുഴകളില്ലാതാക്കി
കുഴൽക്കിണർ ഉണ്ടാക്കും ദൈവത്തിൻ സ്വന്തം നാട് !
ആന്പലും താമരയും വിരിഞ്ഞ തടാകങ്ങൾ
ആഫ്രിക്കൻ പായൽ മൂടും ദൈവത്തിൻ സ്വന്തം നാട് !
കരുവീട്ടിയും തേക്കും പൂത്തുലഞ്ഞ കാടുകൾ
വെട്ടി വെടിപ്പാക്കിയ ദൈവത്തിൻ സ്വന്തം നാട് !
കാട്ടാന കൂട്ടം കൂടി കുതിച്ചു കൂത്താടിയ
കാനനങ്ങൾ പൊയ്പ്പോയ ദൈവത്തിൻ സ്വന്തം നാട് !
പകർച്ചവ്യാധികൾക്കു പരീക്ഷണശാലയായ്
പാശ്ചാത്ത്യർ കണ്ടെത്തിയ ദൈവത്തിൻ സ്വന്തം നാട് !
കുഞ്ചനും കുമാരനും കൊഞ്ചിച്ച കുമാരിയെ
ആംഗലം പീഡിപ്പിക്കും ദൈവത്തിൻ സ്വന്തം നാട്!
ദൈവത്തിൻ പേരും ചൊല്ലി മനുഷ്യർ നശിപ്പിച്ചു
ദൈവവുമുപേക്ഷിച്ച ദൈവത്തിൻ സ്വന്തം നാട് !
Not connected : |
